Nelangsane Guru Basa Inggris SD

Wewaran asilipun ingkang lolos seleksi pandaftaran CPNS (Calon Pegawai Negeri Sipil) taun 2013 sampun medal wonten ing tanggal 24 September 2013 kala wingi. Asilipun inggih menika 637 pandaftar wonten ing bidang Tenaga Guru, 3.098 pandaftar wonten ing bidang Tenaga Kesehatan, saha 9.757 pandaftar wonten ing Tenaga Teknis, ingkang dipunetang dados 13.492 pandaftar. Pengumuman menika katingal jomplang menawi

dipuntingali saking kathahipun tiyang ingkang dipunpundhut dening Pemerinteh Daerah Daerah Istimewa Yogyakarta (Pemda DIY) inggih menika namung 120 tiyang.

Jomplangan menika wonten ingkang dados begjan ugi wonten ingkang dados masalah. Kabegjanan saged katingal kangge Ngatwanto saking Bentak, Kec. Sidoharjo, Kab. Sragen ingkang daftar wonten ing bidang Tenaga Kesehatan jabatan Dokter Spesialis Paru-paru. Dipunarani begja amergi namung piyambakipun kemawon ingkang daftar kamangka ingkang dipunpudnhut dening Pemda DIY ugi namung satunggal tiyang kemawon. Saking menika sampun saged dipunanalisis bilih Ngatwanto menika badhe lolos dados PNS. Ananging kosok balen saking Ngatwanto, Salsabila (samaran) ngraos bilih wewaran asil menika dados masalah kangge piyambakipun.

Salsabila, 31 th, guru Basa Inggris wonten ing salah satunggaling Sekolah Dasar (SD) swasta menika daftar wonten ing bidang Tenaga Teknis jabatan Instruktur Bahasa ingkang dipuntumuti dening 1.491 tiyang ananging ingkang dipunpundhut namung 2 tiyang. Piyambakipun ngendika bilih wonten kathah perkawis dumugi piyambakipun daftar CPNS menika. Salah satunggalipun amarga kwewaran Dinas Pendidikan bilih Basa Inggris dipunicalaken saking SD, kamangka piyambakipun sampun makarya dados guru Basa Inggris wiwit 5 taun kepungkur. Sinaosa ugi kathah guru SD ingkang langkung dangu tinimbang piyambakipun, ananging raosipun boten namung Salsabila kemawon ingkang bingung kedah pindah dhateng pundi, ananging guru-guru Basa Inggris SD sanesipun ugi bingung kados pundi.

Pemerintah sampun maringi waosan bilih Basa Inggris dipunicalaken saking SD. Wewaran samenika dados masalah kangge guru-guru Basa Inggris SD lajeng guru-guru Basa Inggris SD menika kathah ingkang mlayu dhateng jabatan Instruktur Bahasa wonten ing bidang Tenaga Teknis, amargi wonten ing bidang Tenaga Guru boten wonten pilian dados guru Basa Inggris utawi ingkang maringi sarat ijazah Pendidikan Bahasa Inggris/Sastra Inggris. Kamangka Instruktur Bahasa menika sanes makarya dados guru, ananging makarya wonten ing kantor dinas.

Miturut Salsabila, wewaran pemerintah menika lepat sanget. Piyambakipun mangsuli mawi pirang-pirang perkawis, inggih menika ingkang dipunsebataken “Kaping sapisan, sekolah ingkang kathah piyambak inggih menika SD lajeng mata pelajaran Basa Inggris sampun wonten wiwit kala biyen, menawi samenika dipunicalaken, lajeng guru-guru SD ingkang kathahipun nglangkungi jumlahipun SD menika badhe tindak dhateng pundi? Kaping kalih, menawi badhe pindah wonten ing SMP utawi SMA, sampun mesthi bilih wonten ing SMA saha SMP menika sampun gadhah guru Basa Inggris piyambak, ingkang kaping tiga, menawi boten angsal papan gantos makarya, menapa kedah nengga guru-guru Basa Inggris sanesipun pensiun rumiyen? Kamangka guru-guru Basa Inggris taksih nem-nem sedaya, lajeng ingkang kaping sekawan, menapa saged ing jaman samenika bilih guru ngajar boten ing jurusanipun, berarti guru Basa Inggris SD kedah kuliah malih kangge mundhut jurusan enggal supados saged ngajar malih.”. saking sekawan alesan Salsabila menika, piyambakipun wanti-wanti kaliyan pandaftaran CPNS taun menika. Mila boten aneh menawi pandaftar jabatan Instruktur Bahasa ingkang dipunpundhut saking jurusan S1 Pendidikan Bahasa Inggris/ Sastra Inggris menika kathah pandaftaripun.

Salsabila nambahi bilih piyambakipun boten angsal tumut pandaftarn CPNS menika. Sekolah ingkang dados papanipun Salsabila makarya boten maringi ijin bilih wonten ingkang daftar CPNS. Mila piyambakipun ngatos-atos sanget anggenipun daftar CPNS menika. Saking ngatos-ngatose, namanipun piyambak ingkang kaserat wonten ing papan wewaran ingkang lolos seleksi administrasi menika dipuncoret-coret kanthi boten katingal malih, supados boten wonten ingkang mangertosi bilih piyambakipun tumut pandaftaran CPNS menika.

Salsabila dumugi samenika taksih ngajar wonten sekolahan papanipun ngajar kados biasanipun. Piyambakipun namung wanti-wanti menawi benjeng-benjeng kedah ‘mutung’ saking prakaryanipun, piyambakipun sampun anggadhahi pilian sanes. Sinaosa boten dados guru malih, ananging jaminanipun sampun cetha sae. Amarga jabatan Instruktur Bahasa menika badhe dipunpapanaken wonten ing BLKPP Dinas Tenaga kerja dan Transmigrasi.

Kulawarga Salsabila wonten garwa saha putra 2 ingkang ageng piyambak taksih TK ageng. Pangasilan saben wulan antawisipun Salsabila kaliyan garwanipun taksih kathah Salsabila. Garwanipun Salsabila menika sampun boten saged daftar CPNS amargi yuswanipun sampun boten jangkepi, menawi yuswanipun jangkepi, ananging Indeks Prestasi (IP) nalika kuliah ingkang boten jangkepi. Dados, menika dados masalah kulawarga ingkang serius miturut Salsabila. Boten saged menawi Salsabila mutung saking makarya, lajeng namung garwanipun ingkang pados arta jangkepi kabetahan, kamangka putranipun kalih taksih alit-alit. Menawi Salsabila pados lowongan ugi boten saged instan langsung angsal prakaryan enggal. Kejaba saking sekolah, mliginipun saking pemerintah, guru Basa Inggris ingkang dipunwedalaken saking sekolah menika dipunparingi papan enggal piyambak-piyambak kadose adil.

Salsabila ngendika bilih dumugi samenika piyambakipun namung saged usaha saha donga. Soal-soal latian saha kisi-kisi saking Pemda sampun dipunpelajari dumugi samenika kangge ngadhepi ujian CPNS tangga 3 November 2013 benjeng. Donga dinunga ugi dipunsuwunaken wonten ing kulawarga ageng. (Fithria Nur Halimah-11205244024)